स्युडो - हिंदुवाद --- हिंदूंचा खरा शत्रू

जसे स्युडो सेक्युलर 'भारतीय एकता आणि अखंडता' ह्यांचे सर्वात मोठे शत्रू आहेत तसेच स्युडो-हिंदूवादी हिंदूंच्या भल्याचे शत्रू आहेत. फरक इतकाच, की स्युडो-सेक्युलर पैश्यांसाठी आणि मिडीयामधल्या पोकळ मानासाठी असं करतात तर स्युडो हिंदुवादी - टाळ्या, "लाईक" किंवा हिंदू मतांसाठी !

"सगळे भारतीय फक्त "भारतीय" ह्या भावनेने एक व्हावेत" अश्या दिशेने झालेल्या प्रत्येक प्रयत्नाचा स्युडो सेक्युलर प्राणपणाने विरोध करतात.

अगदी तद्वतच, "सगळे हिंदू आपलं 'खरं' भलं समजून वागावेत" अश्या दिशेने झालेल्या प्रत्येक प्रयत्नाचा हे स्युडो हिंदूवादी विरोध करतात.

सार्वजिक गणेशोत्सव, दसरा, दिवाळी ह्या हिंदू सणांना विरोध करणारी स्युडो सेक्युलर मंडळी "सार्वजनिक सण बंद करा!" अशी केकाटत रहाते...आणि आमचे स्युडो हिंदुवादी "मुसलमानांचं यंव असतं आणि ख्रीश्चनांचं त्यंव आहे मग हिंदूंचं सगळंच चालू ठेवा" असं मूर्खासारखं बोंबलतात.

आधीच विभक्त असलेला हिंदू समाज आज गणेशोत्सवामुळे एक होऊ पाहत असेल - तर सध्यस्थितीत ही एकी खरंच होतीये का ? ती अधिक 'वैचारिक', अधिक 'परिपक्व', कमी मद्यशील कशी करता येऊ शकेल हा विचार "हिंदू नेत्यांनी" करून तोच विचार पसरवायला हवा. गणेशोत्सव "बंद" होणार नाही - आम्ही तो होऊच देणार नाही -आणि तो होऊच नये. पण हिंदू नेत्यांनी त्याला जरा पर्यावरणाशी समतोल ठेवणाऱ्या आणि खरं हिंदू संघटन करणाऱ्या स्वरूपात पुढे नेण्यासाठी प्रयत्न केले, तसा संदेश गणेशमंडळांना दिला आणि त्याची अमलबजावणी करून घेतली तर अख्या जगात आपण जे नेहेमी ओरडत असतो ना - हिंदू सण फार वैचारिक आणि सामाजिक आणि वैज्ञानिक विचारांवर आधारित आहेत - हे सिध्द होईल. आणि त्याहून महत्वाचं - हिंदूंचं "खरं" भलं होईल.

तसंच दसऱ्याचं. तेच दिवाळीचं.
दसऱ्याला आपट्याची पानं "का" वाटायची ते सांगा ना...! काय लॉजिक आहे त्या मागे ? ते आज साध्य होतंय का ? दसरा साजराच करू नका कोण म्हणतंय ? उलट आपट्याच्या पानांवरचा फोकस कमी करून "खरी-खरी भेट घ्या - मनापासून मिठी मारा - प्रेमाने गप्पा मारा - चर्चा करा" असं कल्चर प्रमोट करा ना ! त्याने हिंदूंचंच भलं होणार...हिंदूंचीच एकी वाढणार !

पण ख्रिस्तमस / ३१ डिसेंबर / valentine's dayला विरोध करण्यात, खालच्या पातळीवर जाऊन विरोध करण्यात किती तरी शक्ती खर्च करणारे हे लोक आपल्या सणांना अधिक समर्पक, अधिक समृद्ध करण्याच्या फंदात पडत नाहीत.

हिंदूंसमोर खरंच खूप समस्या आहेत. सरकार अत्यंत उदासीन आहे, स्युडो-सेक्युलर आहे. त्यामुळे देशाचं, धर्माचं खूप नुकसान होत आहे. भविष्यात खूप अडचणी निर्माण होऊ शकतात. पण तिकडे "कायमचा निकाल" लावण्याकडे फार कमी प्रयत्न होतात. होतं ते भडक आणि उथळ वैचारिक द्वंद्व.

बरं हे सगळं नं कळायला आमचे स्युडो-हिंदूवादी दूधखुळे नाहीत.

पण ह्या स्युडो-हिंदूवाद्यांना हिंदूंचं भलं करायचंय कुठं?! हिंदूंचं भलं झालं तर ह्यांची गरज, ह्यांचं महत्व संपेल ना! समस्या चिघळत राहिली तरच ह्यांच्यामागे तरुणाई पळत राहील - ही मनात भीती ! ह्यांना फक्त टाळ्या आणि लाईक्स आणि हिंदू मतं मिळवायची आहेत. आणि हिंदू समाजाबद्दल खरी कळकळ असलेले तरुण हे नं ओळखता लागलेत "कट्टर भगव्यांच्या" मागे धावायला.

चालू द्या !

No comments:

Post a Comment